الغاية من الدولة: التقدم و السيادة و الفعل التاريخي و الإنساني
القوميين التوانسة و القوميين الحقيقيين بصفة عامة تهمهم الدولة و ممكن يوصلو لحد تقديسها و ديما طموحهم هو تقويتها و تكبير نفوذها. القوميين تهمهم الدولة و يعتبروها أولوية مطلقة لدرجة انهم يسامحو برشا في موضوع حقوق الانسان و الحريات الفردية و ممكن تكون عندهم ميول استبدادية، لأنو تهمهم الدولة و قوتها لدرجة إنهم ممكن و مكن برشا يضحو على خاطرها بكل المتطلبات الاجتماعية و يتلفو تماما كل حكايات الفقر و البطالة !!!.
هذا صحيح لأجل قوة الدولة إداريا و إقتصاديا و عسكريا… وين تميل الإتجاهات القومية لنها تكون يمينية برشا ( لأجل التقدم الإقتصادي) و ممكن إستبدادية أحيانا لأجل تعبية الجهد العام . و هذا الي يخليها عادة إنها تكون صريحة علخر و متطرفة و حالمة الشي الي يخوف المعتدلين و المسالمين و الراضين بالوضع.
ـ لكن يجي السؤال هنا: باهي فهمناك و علاش الدولة؟ علاش هذا لكل؟ علاش هالغرام و تقديس و الاحترام للدولة ؟؟؟
نحاول نطرح السؤال بطريقة أخرى:
تويكا شنوة هو دور الدولة الرئيسي حسب الرأي العام التونسي بكل؟؟؟
و شنوة الدور المثالي للدولة الي يعتقدوه التوانسة ؟؟؟
إذا كنت من التوانسا الي يقولو هكا فالموضوع هذا يهمك علخر:
-
مهمة الدولة انها توفر الأمن.
-
مهمة الدولة إنها تفض المشاكل بينات لعباد انها تحقق العدالة.
-
مهمة الدولة انها تحافظ على الهوية العربية الاسلامية.
-
مهمة الدولة انها تطبق الشرع الاسلامي.
-
مهمة الدولة انها توفر خدمات عمومية: نقل،تعليم،اتصالات،مياه،كهرباء،صحة ….
-
مهمة الدولة انها تحقق العيش الكريم :عمل لايق،سكن لايق،تقاعد …
-
مهمة الدولة ضمان الحريات الفردية .
-
مهمة الدولة دعم القضية الفلسطينية.
-
مهمة الدولة تحقيق الوحدة المغاربية .
-
مهمة الدولة تحقيق الوحدة العربية و الإسلامية .
-
مهمة الدولة دعم قضايا الشعوب المظطهدة في العالم .
حسب الرأي العام التونسي بكل تنوعاتو الفكرية تعتبر مهمة الدولة هي تحقيق أهداف معينة، و الهنا أي تونسي محدد هدف و يرا إنو واجب الدولة هو تحقيقو. يعني على الأقل متفقين إنو الجميع يعترف ضمنيا إنو من غير دولة مايمكنش تحقيق الهدف، و الجميع يعترفو بضرورة وجود الدولة لتحقيق اهدافو.
لهنا نكونو جينا للقومية التونسية :
بما أنو كل التوانسا نحتاجو لالدولة كاداة تحقيق اهداف معينة ( الي هو) اي انها ماكينة عامة و لذا فانو لازمها تكون :فعالة و الا تولي زايدة !! يعني انو نحتاجو موش الدولة كهو و انما زادا دولة فعالة /دولة قادرة /دولة ناجحة /دولة نعملو عليها اي نحتاجو لدولة قوية.
إيه نعم اكثرنا تحررية و اجتماعية يحتاجو لدولة قوية باش تنجم تحقق امانيهم حريات،تفرهيد،رفاه،انسانيات … !!! و كيف كيف الزوالي البكاي يحتاج لدولة قوية باش تحميه من الظلم و تأمنو من المجرمين!!! و كيف كيف العروبو اسلامي لازمو دولة قوية باش يساند القضايا العربية الاسلامية !!! و كيف كيف الي يحبو على الشريعة يحتاجو لدولة قوية باش تنجم تفرض الشرع و ماتخافش من الغرب !!!!
يعني مجرد وجود دولة بالإسم مايكفيش يلزمها تكون فعالة و الا تولي زايدة !! . نحتاجو لدولة فعالة و دولة قادرة و ناجحة ،دولة نعملو عليها أي نحتاجو لدولة قوية.
==> جميع التونسيين يحتاجو لدولة قوية .
و رغم إختلاف القومية التونسية جذريا مع كل الأهداف التونسية المتداولة و تبنيها لأهداف مختلفة فإنها ترا قبل كل شي إنو مهمن كان الهدف فانو يحتاج لدولة قوية و لذلك فانها تراها اولوية الاولويات و من بعدها يبدا النقاش حول التوجه الفكري و السياسي .
الدولة التونسية كيف قاطرة التران باش تهز الشعب التونسي نحو مستقبل معين ، لكن كيف هي تبدا: عاجزة، فاسدة، تاعبة، متخلفة، مرهونة، تابعة، ضعيفة ، محطمة و حقيرة فإنو كل الأهداف التونسية بش تضيع و تقعد مجرد أماني و كلام فارغ و بش يقعد الشعب التونسي بكلو على بعضو يسب و يلعن و يبكي و يتمنا كان مجاش تونسي!
و لهنا قبل ما نحكي على سياسة الدولة و شنية الأهداف الي يلزم تحققهم، لازم نفهمو إنو من غير الدولة ماعندنا وين نوصلو و إنو الدولة أدات نستخدموها لتحقيق اهداف ما هيش عدو يلزم نحاربوه و ندمروه او نضعفوه.. و لذا لازم نركزو جهدنا كتوانسا على قوة الدولة باش تولي قادرة تحققلنا أهدافنا و من بعد نتناقشو في الثنية الي يلزم نمشو فيها.
و لهذا القومية التونسية تعتبر أن الدولة التونسية هي قضيتها المركزية، لأنها هي الي بش تمكننا من تحقيق الأهداف القومية العليا => التقدم و السيادة و الفعل التاريخي و الإنساني و هذا علاش نعتبروها شبه مقدسة و نراو انو تقويتها و دعمها و إعادة تأسيسها أهم من كل المسائل الأخرى، أهم من كل المسائل الإجتماعية و الدينية و الرياضية و المطالب الفردية…
Views: 682
