التوانسة : المعنى الحقيقي والمفهوم الفعلي للتونسة

“التونسي” : هي كلمة نقولوها في العادة على إنسان عندو بطاقة تعريف تونسية او بوه عندو بطاقة تعريف تونسية، اي انو مواطن في الدولة التونسية او بوه مواطن في الدولة سواء كان مقيم فيها او مقيم في الخارج، فخور بيها او مستعار منها ،يحبها او يكرهها. يعني عادة نحن نقولو تونسي لوصف علاقة قانونية تربط انسان فرد بالدولة التونسية: الجنسية التونسية .

ـ التونسة هكا هي مجرد ورقة لا اكثر لا اقل وتعني قانونيا مجموعة إلزامات او واجبات وحقوق ممكن الحصول عليها. هذي هي التونسة القانونية حيث يمكن لأي كان يستجيب لشروط معينة انو يحصل على الجنسية التونسية و يولي من بعد مواطن تونسي.

ـ هذا المواطن التونسي ينجم يخرج من تونس و يعيش في بلاد اخرى ،دولة اخرى ،يلتزم بقوانين اخرى،يساهم في تحقيق أهداف أمة اخرى و يتجنس بجنسية اخرى .

ـ هذا التونسي القانوني ينجم يكون معلابالوش بلكل بالأمة التونسية، يكون مثلا ناوي يخرج منها علطول او يكرهها او ناقم عليها او متواطئ مع اعدائها او عميل او خاين او ارهابي.

ـ هذا التونسي القانوني ينجم بسهولة يكون طفيلي، عالة يحاول بكل مجهوداتو انو ياخو حقوقو و يخل بإلتزاماتو : اي انو يستنفع لأكبر قدر مجانيا مغير مايعطي شي، لا جهد لا وقت ولا موارد .

– هذا التونسي القانوني ينجم بسهولة يكون فاسد، سارق، مخرب، مغتصب، قاتل. ينجم يكون وبال على تونس و باقي التوانسة.

ـ هذا التونسي القانوني ينجم يعتبر تونس :

ـ 1.حبس يستنا وقتاش يهرب منو.

ـ 2. عدو يستنا وقتاش يدمروا.

ـ 3. غنيمة ياكل منها اش ينجم ياكل.

ـ 4. بلاد موجود فيها لفترة معينة و ماتهموش ابدا.

ـ 5. غلطة تاريخية لازم تتنحا في دولة العرب او دولة المسلمين او الامازيغ او الافارقة او الانسانية.

ـ 6. بلاد حقيرة هي و شعبها و خامجة و لذا يستعار منها و يحاول كل جهدو إنو يهينها و يتعالا عليها .

ـ لذا فإن الشعب التونسي أي مجموع حاملي الجنسية التونسية ينجمو موش لكل يكونو مهتمين بالمصلحة العامة التونسية و متحيرين من الأخطار المحدقة بتونس و لذا فإنو ينقسم لزوز أصناف :

ـ 1. المهتمين بالأهداف العامة التونسية الي تتعلق بالسيادة ، القوة، العظمة و تحقيق الأمجاد التاريخية.

ـ 2. الموش مهتمين بالأهداف العامة التونسية.

ـ المهمش مهتمين هوكا واضحين علخر : معلبالهمش ،بش يخرجو ،يكرهو لبلاد ،يحتقروها ،عملاء لاعدائها ..

ـ لكن المهتمين موش معناها الي يتمنو او يقولو انهم يهتمو بتونس و يتمنو تحقيق أهدافها بل المهتمين يعني التوانسة الي تمسهم الأهداف العامة التونسية و يعتبروها أهدافهم الشخصية ويعتبرو تونس : بلادهم ،دولتهم ،شعبهم ، إنتمائهم الوحيد يخافو عليه ،يتحيرو عليه ، يخدمو عليه و يضحو على جالها بالغالي والنفيس و ترخص قدامها حياتهم .

ـ هاذوما التوانسة المهتمين بش نسموهم التوانسة الحقيقيين خاطر وجود تونس مرهون بيهم .

ـ التوانسة الحقيقيين هوما المهتمين ب: المصالح التونسية و الاخطار الي تهدد “تونس” ، هوما التوانسة الي يخممو في تونس لأنها بلادهم الي اختارو بملئ إرادتهم انهم يعيشو فيها ويكونو مواطنين في دولتها و يبنو فيها مستقبلهم .

-التوانسة الحقيقيين هوما الي تهمهم حياتهم الي مبرمجينها في تونس . هوما الي مبرمجين خدمتهم، مشاريعهم ، مستقبلهم ، طموحاتهم ، عايلاتهم ،اولادهم وموتهم في تونس ،مع الشعب التونسي و في ظل “الدولة التونسية” كهو و مختارين هذا عن وعي وإرادة حرة (مش خاطر مجبرين و مانجموش يخرجو) .

– المعنى الحقيقي للتوانسة هو:

القلقين والحاسين والمتحيرين على تونس ، المحبين لتونس و الي حياتهم بكلها مربوطة بتونس من الولادة للوفاة. هاذوما تونس تعنيلهم وطنهم ،دولتهم ، شعبهم ، وأمتهم ، موطن مستقبلهم ، موطن اولادهم ،موطن عايلاتهم، و مدفنهم بعد مايموتو. هاذوما حياتهم في انصهار كامل مع تونس الي ينفعها ينفعهم و الي يضرها يضرهم و الي يهددها يهددهم و الي ينهض بيها ينهض بيهم .

ـ التوانسة هاذوما تونس في فكرهم ، تونس في قلوبهم وفي أرواحهم .التوانسة هاذم يعيشو في تونس و تونس تعيش فيهم .هاذم يعيشو بتونس وتونس تعيش بيهم .هاذم الخلايا الحية للجسد التونسي، هاذم الأحجار الصلبة لبنيان الدولة التونسية. هاذم وعاء التونسة و عبرهم هوما تنتقل روح تونس المقدسة في الزمن.

-اذا التونسة الحقيقية مهيش مجرد العلاقة القانونية بين الانسان و الدولة التونسية بل العلاقة او التوحد الروحي بين الانسان و تونس .التونسة هي هوية ثابتة، هي انخراط روحي ، هي مصير. التونسة هي اختيار و تحقق إرادة حرة .الانسان يصير تونسيا بإعطاء روحه و فكره و عواطفه و حياته لتونس و هذا العطاء ماينجم يكون كان حر و لذا التوانسة الحقيقيين هم الاحرار الحقيقيين في تونس .

-التونسة اذا ماهيش أوراق رسمية و ماهيش وراثة و ماهيش حساب متع حقوق وواجبات وانما هي وعي ، إرادة، اختيار، مصير ، هوية وولاء مطلق ، نقي و كامل للأمة و للدولة و للوطن التونسيين.

– التونسة الحقيقية اذا لا تقبل الشراكة مع انتماء او جنسية أخرى ، التونسي الحقيقي مينجم يكون كان تونسي فقط ، تونسي أولا و تونسي أخيرا .

– التونسة الحقيقية تعني اذا التضحية بأي مصلحة شخصية اذا تعارضت مع المصلحة العامة التونسية و هذا يعني الأولوية التونسية على الإنتماء للقطاع ، الجهة، الجنس، المهنة، الفئة الاجتماعية او الأصل العرقي المفترض .

– التونسة الحقيقية هي طريقة حياة و هي حقيقة روح التونسي. التوانسة الحقيقيين هم الي ماشين في طريق تونس و الي تونس هي حقيقيتهم وجوهر أرواحهم و مسعاهم في الحياة هو تقديسها والجهاد في سبيلها .التونسة هي بطاقة تعريف روح الانسان التونسي و لذا هي مطبوعة غادي و منها تسري في حياتو و تتعدا لأولادو وأحفادو.

– انت تونس خاطرك تحب تكون تونسي وتضحي بكل شي باش تكون وتبقى تونسي. انت تونسي خاطر تونس هي معنى حياتك. انت تونسي بملئ ارادتك و عن وعي بتونس و حالتها و استعداد كامل للعيش فيها و تحدي كل العالم على خاطرها. انت تونسي خاطرك اخترت انو تونس هي مصيرك و مصير أولادك من بعدك . هذا هو اش معناها تونسي واش معناها التونسة الحقيقية .

Visits: 118