تفكيك اللغز.. الثروات الطبيعية في تونس
الأمة التونسية
” تفكيك اللغز … ” هكذا وصفت مجلة أفريكان منجر قرار وزارة الطاقة بتقديم معطيات دقيقة عن قطاع المحروقات في خبر منشور بتاريخ اليوم 9ماي 2017، و الي قالت ليكون ردا على الحديث المتكرر و اللغز المبهم الذي يحوم حول حقيقة الثروات الطبيعية للبلاد و نوعية العقود المبرمة مع الشركات العاملة في المجال، فضلا عن مدى استفادة الدولة من الضرائب المفروضة على هذه الشركات…
الموضوع ولينا نسموه “لغز” من كثرة الحديث على آبار البيترول و الغاز و الملح و الشركات البترولية و ماتابعو من اعتصامات و مظاهرات و احتجاجات بين مطالب بكشف الحقيقة و نشر العقود و بين مطالبين بنصيبهم من “الثروة” ، و ناس تحكي على تونس تعوم فوق بحيرة بيترول و ناس تقول تونس “في هبطة!” بين الجزاير و ليبيا …
وزيرة الطاقة و المناجم هالة شيخ روحو باش 2016 ، باش تقص الثنية على كثرة الكلام و الاشاعات و بعد سنوات من التهرب من نشر عقود استغلال الثروات الطبيعية و أخيرا جابت ماتسميه بالحل و قالت باش تنشر كل “المعطيات” الكاملة على ملف الثروات الطبيعية بالتعاون مع معهد الاحصاء !!! لكن العقود نفسها الي تحوي كامل التفاصيل باش تبقى سرية داخل دواليب الادارة التونسية، رغم ان الدستور و القانون يفرض على الدولة العمل بشفافية و نشر كل المعطيات الي ماتمسش بالأمن أو الجيش.
موش الوزارة فقط رافظة تنشر العقود ، حتى من نواب المجلس في أفريل 2017 صوتو على قانون لايلزم الوزارة بنشر العقود في الرائد الرسمي، حتى من الحكومات الكل و كل الوزراء الي شدو حقيبة الطاقة من الثورة لليوم ما فكروش في نشر العقود و إزالة اللبس و القطع مع كل الاشاعات الي تروج على أرقام تنجم تكون حقيقية كيف ما تنجم تكون مبالغ فيها.
و الغريب في الأمر أن العقود هذه تنجم تلقاها منشورة في أرشيف الشركات المستثمرة و ثما امكانية باش نتحصلو عليها من أرشيف الدول الي نتعاملو معاها في قطاع الطاقة ، و رغم هذا في تونس مستحيل يعطوك أي معلومة كاملة.
علاش؟
==> الإشكال الي نعيشوه هو أن كل السياسيين الي في السلطة و حتى من المعارضة رافضين العمل بمبدأ نشر البيانات الرسمية باش يبقى يخدم بأريحية و من غير أي حسيب أو رقيب.
موش حتى في أجهزة الدولة بل نلاحظوه كيف نفتحو المواقع الرسمية للأحزاب التونسية ماتلقاش فيها تقارير الحسابات السنوية متاعها أو التقارير الأدبية أو لوائح مؤتمراتها ( قبل اشهر بعض الأحزاب نشرت تقاريرها المالية بعد ما فضحتهم منظمة أنا يقض و سلطة الأضواء على عدم التزام الأحزاب التونسية بالتصريح بتقاريرها المالية) .
==> عقلية التكتم على المعلومة و الإستأثار بيها لأنفسهم و الدائرة المضيقة ، ماهيش تجاوزات متاع نظام قديم أو نظام جديد أو أحزاب حاكمة وإلا معارضة .. بل هي عقلية جيل سياسي كامل تربى على نفس العقلية و يفكر بنفس الأسلوب.
Visits: 634
