بين زوز نخب : تونس بين الماضي و المستقبل
تونس الي نعرفوها ملي تولدنا حتى لتو: بلاد فقيرة و ضعيفة و مهانة و معندها حتى قدر في العالم و متخلفة و مسالة في فلوس من الشيرات لكل و سيادتها منتهكة ملي يسوى والي ميسواش و حدودها البرية و البحرية مخترقة جهار نهار ( طلاين ،ليبية ،مصارى و دزيرية و خليجيين) .
الشعب عايش في الفقر و الهم و الميزيريا و الذل في بلادو من البراينية و حاس كان بالقهرة. هاذا معناها انو تونس بلاد شبه مستعمرة عالمية. هذا الواقع كنا عايشينو قبل 2011 و حلمنا و أملنا انو بش يتبدل بعد الثورة لكن بلعكس الأمور زادت تأزمت و انهارت تونس تماما تقول دار خربة .
معناها رغملي الحكام تبدلو جذريا بفعل4 انتخابات حرة تجددت فرق الحكم المركزي والجهوي و المحلي . و السؤال الي يتطرح علاش ؟؟
كي نجيو نشوفو لحقيقة فانو وضع اي دولة في العالم هو ديمة نتيجة السياسات الي تحطها حكوماتها و السياسيات هاذي تبدا نابعة من أفكار و رؤى النخب الأيديولوجية و السياسية في تلك الدولة .
و تونس عمليا النخب الحاكمة متغيرتش فيها جملة لنو الجيل الي حكم من الخمسينات لتو هو بيدو بنفس الأفكار و الأساليب و الخطاب زادة متبدلت كان لوجوه و الأسماء. و هذا عادي لنو الفكر الي أنتج النخبة هذيكة مزال هو السائد في تونس.
الفكر هذا يرى تونس :
1.تونس تنتمي لأمم أجنبية ( عربية واسلامية و امازيغية) لذا يمحيها كأمة مستقلة و يردها مجرد تابعة.
2. يرا تونس من الخارج و يتنبى رؤية الأجانب ليها لذا يتجاهل مشاكل البلاد الأصلية و يركز في التفاهات الغربية و الشرقية ( علمانية ـــ حداثة ـــ قضايا الأقليات و الصراعات الدينية و اللباس و الماكلة و الحكايات الفارغة).
3. ميراش تونس قادرة على التقدم الإقتصادي و على إنتاج الثروة لذا تلقاه يجري للقروض و ديما معمل على السياحة و الاستثمار الأجنبي رغم كل الكوارث الي نتجت من الثمانينات لتو.
4. يحتقر كل التراث الثقافي و التاريخي التونسي و يجهل وجودو أصلا لذا تلقاه ديما يستورد و ينشر في ثقافات و أساليب حياة أجنبية (من فرانسا لأفغانستان و كل شي جربوه فينا).
5. وأخيرا مايمنش بالأمة التونسية و بقيمتها في أفريقيا و العالم لذا ديما يحقر و يذل التوانسة لمصلحة الأجانب مهما كانت جنسيتهم.
معناها ملخر مع النخبة السايدة ماثما حتى حل و لذا الناس الي تحلم بمستقبل آخر لتونس (الماضي مشا و الحاضر هوما استولو عليه) الناس الي تحلم بتونس قوية متقدمة رائدة و تقود أفريقيا. الناس الي تحلم بأمة مستقلة و تعيش عصرها و بقدرها و مكانتها في العالم.
الناس الي تحلم بشعب حر (حلم آلاف السنين هذا) و بكرامتو في تونس و لبرة. الناس الي عندها احلام كبيرة لتونس و الي عندها طموحات للفعل لازمها تفيق على رواحها و تبدى من الصفر مشروع بنيان نخبة جديدة.
و من غادي يبدى طريق الحل و باين انو طريق طويل صعيب و فيه برشا خدمة و صبر وعرك و صراع خاطرو طريق بنيان الجديد الي تستحقو تونس و لذا الطريق هذا ماهو بش يلم كان القوميين التوانسة الصحاح و الأقوياء الي عندهم إيمان حقيقي بتونس و شعبها.
Visits: 87
