حوار مع صديقي الرافض لوجود أمة تونسية

الي دفعني لكتابتها حوار جمع احد القوميين التونسيين مع شخصية إعلامية شبابية و شكلي صدمة، و هذا ملخص الحوار:

قومي تونسي و مؤسس في الحزب القومي التونسي وجه دعوة عامة عبر الفايسبوك للشباب التونسي المستقل والمتزن في هويته و الوطني في انتمائه الى تأسيس حركة سياسية شبابية وطنية.
و وجه دعوة خاصة لأحد اصدقاؤو من الناشطين في الجمعيات و الإعلام بش يطلع على أفكارنا و موقعنا الإلكتروني و صفحاتنا: نحنا بطبيعتنا حركة سياسية شبابية تحب تلم الناشطين و تعبئهم في مشروع سياسي تونسي.

صديق صاحب الدعوة و هو شخصية عامة محترمة انقض على دعوة القومي التونسي و بدا يكيل في الإتهامات بدون أن يقوم بأي مجهود للإطلاع على بعض المقالات و تحليلها و نقدها، و كانت التعاليق على الدعوة كالتالي:

1. من مرقته باين عشاه.. تونس ليست أمة.. تونس جزء من أمة.. هذه محاولة لسلخ شعب من جذوره.

2. أنا لست ضد فكرة وجود حركة شبابية جديدة ولست ضد مبادرات الشباب فهي مطلوبة.. أنا علقت على عبارة الأمة التونسية لا غير..

3. شنوة اللي باش ناقشو.. أن تونس أمة وإلا لا؟ أنو أوروبا رغم كل مشاكلها عندها يورو موش فرنك ومارك.. الخ؟.. وأن الدينار يساوي ربع يورو ومع ذلك يلزمنا نزيد نتمسك بالقطرية المريضة ونعملوا لها أحزاب زادة؟ هذه أشياء للنقاش؟؟
عندي هذا نقاش لا ينفع.. عندي هذا تعبير عن الإمعان في التيه.. مفروض عندنا 60 سنة من الفشل والتبعية.. النقاش عندي كيف ننسق مع الأجوار الأقربين على الأقل؟ كيف نقوي شعوبنا بتقارب سياساتها الخارجية في مواجهة الأقطاب الكبرى هو النقاش المثمر.. لماذا تتفاوض أوروبا موحدة مع تونس لوحدها في اتفاق الشراكة؟ وتتفاوض مع الجزائر وحدها في اتفاق الشراكة ومع ليبيا وحدها.. ونحن جيران يجمعنا التاريخ والدين واللغة.. الخ ولا ننسق مع بعض.. لماذ يحصل هذا؟ .

4. توة بجديتكم تعتبروا تونس أمة؟ وبجديتكم ما تعرفوش آش معناها تونس وحدها تفاوض أوروبا في اتفاق شراكة؟ وبجديتكم ما تعرفوش أن الدينار كي يكون وراه فلاحة تونس وغاز الجزائر وبترول ليبيا وسوق من 60 مليون ساكن يكون أقوى من دينارنا الحالي اللي باش تولي قيمته قريبة من الدورو متاع أيام طفولتي؟

في نقض الحجج المقدمة:

1. مبدئيا:

راهو ما يجيش تحكم ع الكتاب من عنوانه : مقالات و كتيبات و صفحات فايسبوك لم يقع قراءة حرف منها و الاجابة الجاهزة: محاولة لسلخ الشعب عن هويته … وين قريتها و كيفاش وصلت فقت بيها المحاولة هذي من عنوان الصفحة !! يعني ناشط في الشأن العام و سياسي مؤثر في الرأي العام يتحول لمجرد نبار على جمعية عمرو ماراها تكور.

2. خارج التاريخ:

مليون واحد تطلب منو بش يبينلك ما يثبت إنو تونس ليست امة فتكون الإجابة : أوروبا توحدت و العالم يتوحد ؟ و الإجابة هنا ساهلة بربي وين تراو فيها اوروبا توحدت : إنڨلترا إلي استحفظت ع الاسترليني و تويكا هاو خرجت من الإتحاد الاوروبي ؟ البديل في المانيا لي جاية ضد السياسات الاوروبية الموحدة و ضد المستشارة ميركل : 94 نائب البوندستاغ و 07 برلمانيين اوروبي يقع إستغلاله لمعارضة السياسات الاوروبية !! و إلا لعل فرنسا لي مارين لوبان فيها و اليمين الفرنسي فيه دعوات للإنسحاب من الناتو و من الإتحاد الاوروبي ؟ هذا خاطي البرامج السياسية في النمسا، سويسرا، المجر، ايطاليا، تشيكيا، بولونيا، إيرلندا و الي تدعو لمقاطعة السياسات الاوروبية الموحدة المضرة بالهوية الاوروبية (حسب زعمهم) و الارقام موجودة و الاحصائيات موجودة !!

3. خارج المنطق:

إثبات ان تونس ليست امة يصير بإدعاء أن اوروبا موحدة و العالم موحد غير صحيح كونه خارج التاريخ و زيد خارج المنطق : شنية علاقة النسيج الاجتماعي التونسي الذي يكون امة مستقلة بوحدة اوروبا من عدمها ؟ وينها الحجة المنطقية او السببية ؟ الاتحاد الاوروبي لا يشمل كل الدول الاوروبية (سويسرا، صربيا، البانيا، روسيا، ايسلندا، النرويج) فهل ان السيوسري او النرويجي نزعت عنهم صفة الاوروبوية ؟ اذا كان نعتبروهم اوروبيين فإن التوانسة و المغاربة و الاتراك ينجموا يعتبروا انفسهم اوروبيين ايضا بحكم ان علاقات التجارة و الحواجز الديوانية متماثلة ؟

.. هذا من غير ما نحكيو ع الجهبذة متاع استراليا و بريطانيا و بروتستانت و فازات و بريطانيا ما تعين خيط في ابره كان ما تشاور امريكا و إلي بش يطلع من بعد فامبير شيطاني يحكم فيها و هو مخلد هناك منذ عصور الكيانات السحرية القديمة ..

4. الحجة المصلحية:

الحجة الي تقول “من مصلحة تونس ان تتوحد مع بترول ليبيا وغاز الجزاير في مفاوضات شراكة موحدة مع الاتحاد الاوروبي” : هي حجة مصلحية جميلة & لكن شعملت ليبيا ببترولها و الجزاير و ببترولها و غازها و السلعتان مرغوبتان اوروبيا و بشدة ؟ هل ان ميزان ليبيا و الجزاير التجاري مع اوروبا عاجز أو فائض رغم وجود بترول و غاز؛ ميزانها التجاري و نسبة من الناتج القومي الخام و تسعيره و تنسيبه حسب سعر الدولار / اليورو، و بعيدا عن المهروقات ماقيمة الاقتصادين الجزائري او الليبي ؟

قتلي عجز تجاري مستدام و كيف هوما اصفار علاش تحب توحدني معاهم و شنية مصلحتي بش نتوحد معاهم و انا صفر ؟

صديقي..

حل تونس يكمن في إعادة بناء شرعيتها عبر كبسان النظام السياسي و الإداري للدولة و إعادة ارساء قواعد عملها و تعاملها مع محيطها، فالنظام السياسي التونسي نظام خايخ و كلاه السوس و ما تستناش من هذا النظام ان يقوم باي مجهود للنهوض بالاقتصادي و خلق الثروة و حل مشاكل كان بخنوعه و عمالته و فساده سببا في خلقها.

هدم النظام الخايخ يستحق لمعاول و لسواعد اشداء و كابابلية و إرساء نظام جديد قوي يستحق مجهود كبير في البناء و التشييد ، نفس الشدة و المجهودات الي رافقوا بناء أي دولة في التاريخ منذ فجر التاريخ المدون لحد هذه الساعة و إذا كان تونس تفتقد لهذه السواعد المبادرة فلن توفرها لها لا اوروبا و لا جيرانها و لن تحقق اي رخاء أو تقدم او كرامة و ستبقى ذليلة، مهانة، غنيمة لمن يدفع اكثر و فاقدة للشرف كيف الفتاة “عفاف” الي خرفتلكم خرافتها في التقديم.

۩ ” يا أيها الذين آمنوا بالقضية التونسية، يا أيها الذين آمنوا بالأمة التونسية، ان الأمة التونسية لا تنبني الا على جماجم العباد، ولا تقام الا على سواعد الشباب ! جاهدوا في الله حق جهاده، اذا اعترضتكم جند الهزيمة شرّدوهم في الفيافي والصحاري وافعلوا بهم ما شئتم، وأنتم الوطنيّون الدائمون في بلادكم وهم الدخلاء عليكم. ۞ عن خطاب 9أفريل لعلي البلهوان بتصرف.

۞ قَالُوا يَامُوسَى إِنَّ فِيهَا قَوْمًا جَبَّارِينَ وَإِنَّا لَنْ نَدْخُلَهَا حَتَّى يَخْرُجُوا مِنْهَا فَإِنْ يَخْرُجُوا مِنْهَا فَإِنَّا دَاخِلُونَ۞ المائدة ۞

Visits: 164