المواقف العامة الفكرية-العاطفية تجاه المشاكل التونسية الملحة
ـ في الوضع الحالي وين الامة التونسية تعاني من الاختراق و النفوذ الأجنبي ، المديونية، التبعية للخارج، الضعف و التخلف . في الوضع الحالي وين فما اخطار داهمة على الامة مثل الاستيطان و الازالة من الوجود فإنو عموم أصحاب الجنسية التونسية ينقسمو حسب افكراهم و ميولاتهم العاطفية ل9 انواع :
ـ 1. الماعلبالهمش :
هاذم الوضع التونسي ميهمهش ابدا، ميقلقهمش، ميضرهمش و مهمش مهتمين بتاتا بتونس .هوما تويكا عايشين فيها كهو و مهما كان الي بش يجرالها مهمش هنا. هاذم انتمائهم ليها سطحي علخر لنهم يعتبروها مجرد جنسية ,محل سكنى او عمل و دوب متجيهم فرصة يخرجو منها.
ـ 2. الندابة :
هاذم جماعة تونس معادش فيها امل ،تونس وفا عليها الراي .تونس مشات تزمر .تونس شبقا فيها انتهات للابد. تونس معادش تتصلح لقيام عيسى.امورنا بش تقعد هكا للابد تونس ضاعت ،يا حسرة على تونس و البكاء و العويل.تخمامهم لكل ماشي للحزن و التحسر .بنسبة ليهم الحياة التونسية هي جنازة يمشو فيها . الماضي هوا حياتهم و حنينهم متوجه لتونس السابقة الي قبل الثورة ,الي قبل بن علي ,الي قبل الاستقلال أصلا . هاذم الماضي ولا مزيان بكلو و سحري بنسبة ليهم ومشابه لطفولة سعيدة لشايب حزين.
ـ 3. السبابة :
هاذم يقولو تونس نعل بو الجد بتع بوها ،تونس متجي شي ،تونس متسوا شي ،تونس بكلها على بعضها :شعب/دولة/وطن هيا اخيب بلاد في العالم . بلاد كلبة ( يتقال كلام آخر في الحقيقية) ، شعب ***** ، بهيم، متخلف ،سياسيين فاسدين. “اذا حللت بافريقية فوافق او نافق او غادر البلاد ” و عندهم مجلدات سبان،تحقير و اهانة لتونس مثل ظبوط القردة ،بلاد الثعالب و جربوعستان. هاذم مشكلتهم تونس بحد ذاتها و فشل حياتهم يعلقوه عليها.
ـ4. اليائسين :
هاذم جماعة تونس مستحيل تنجم تعمل حاجة، مستحيل تونس تنهض ,متنجمش تتقدم و حتا كان نجمت ميخلوهاش. تونس شتقعد هكا متخلفة,ضعيفة و محكوم فيها. الضعف,الخضوع,الانقياد ,المديونية,التبعية و الارتهان للخارج بنسبة ليهم حتميات تونسية و مفماش امل او إمكانية تغيير تاريخي لنو هاذي هي طبيعة و حقيقة تونس بنسبة ليهم.
ـ 5. المستسلمين :
هاذم جماعة الله غالب هاذا شحب ربي معنا منعملو ، نشالله تتصلح احوال لبلاد ،تو احنا الشعب الزوالي شنجمو نعملو .السياسيين فاسدين علخر و الشعب مسكين يتحمل النتيجة .هوكا الشياب تحكم و الشباب يحرق .منجمو نعملو شي ،هانا ثرنا شتبدل متبدل شي لذا نسكتو و ندعو ربي يصلح الاحوال و يخزرلها البلاد و يمنعها .ما عاد عنا كان الدعاء . تويكا نبلعو السكينة بدمها و زايد الكلام كلو زايد . كل واحد يمشي يشوف روحو و البلاد نشالله ربي يلطف بيها . هاذم خسرو الحرب تماما و عايشين الهزيمة.
ـ 6. الهاربين :
هاذم جماعة العمر قصير و منجموش نضيعوه في مشاكل تونس انا نحل مشاكلي و انتي حل مشاكلك و تونس ليها ربي . علاش احنا بالذات نهزو مسؤولية تونس ؟ شبيهم باقي التوانسة ميحسوش ٱخي بلادنا احنا كهو .بصراحة مسؤولية تونس منجموهاش يحبلها وقت وفلوس و جاش و هاذم امور منكسابوهمش وضعنا صعيب و كل واحد يمنع روحو يا خويا. هاذم يحبو يهربو من تحمل المسؤولية القومية عبر الاحتماء بالحجج الانانية .
ـ 7. المنافقين :
هاذم جماعة انا نحب تونس و نموت عليها و كل شي تاريخها,حضارتها,تراثها,ماكلتها و محلاها تونس الحاصل . لازم نمنعوها ,لازمنا ناقفولها ,لازمنا نضحو بالغالي و النفيس على خاطرها اما سامحوني راني تويكا لاهي عندي مشاكل اقتصادية،عايلية و نفسية( انفصام في الشخصية) و لذلك منجمش نتواجد معاكم لأجل تونس اما تو نعاون من برة بالدعاء و الاماني القلبية و هاني من موقعي نشجع تونس بكل قوتي و على طول صوتي. هاذم ادعياء الوطنية الكلامجية الي يتغنو بتونس اما مش مستعدين يضحو على جالها بأكثر من الكلمات.
ـ8. الرافضين لوجود تونس :
هاذم جماعة تونس هاذي مكارهاش موجودة ،خلقها الاستعمار، تي وقتاش جات و منين جات تونس هاذي , فما امة عربية,امة إسلامية و ممكن امة امازيغية .في وسط وحدا منهم فما جزء اسمو تجي تونس اما وحدها مستقلة،وطن،شعب،دولة و امة لا سامحني ميجيش منو . هاذم حاقرين تونس, مستصغرينها و مستهانين بيها و ميراوهاش تستحق انها تكون هوية او انتماء و لذا بنسبة ليهم تونس لازم وجودها يتلغا في وحدة ما اكبر منها مساحة و عدد سكان .
ـ 9. الوطنيين :
هاذم فئة خاصة علخر مهتمة بتونس لأنها وطنها ومستقبلها بكلها فيه و مهيش ناوية تخرج . تحب تونس الحب الطبيعي-الغريزي حب الإبن لأمو .تحترم تونس كيما أمها لكن مهيش عارفة شتعمل بالظبط مهيش عارفة كيفاش تنظم افكارها و جهودها و تتوحد .هاذم الي عليهم العمال في انقاذ تونس لو يكتسبو وعي حقيقي بالمشاكل من نواحي العوامل العميقة و طريق الحل و لو يفهمو كيفاش يتنظمو ويتوحدو.
Visits: 26
