الشعر الشعبي التونسي : ذهب ماهوش معيّر

فقط تأملوا روعة المعاني :

مازلــــــــــــــــت باطــــــــــــــــــي ** و مازال ريحي ما بغاش يواطي

مازال بيدي الحلّ ** ومازلت كل اللي يربطوه انحلّ
ومازلت زي الصقر كيف انطلّ ** لين تنكسر تركع عيون الواطي
ومازال صوتي كي فحل البلّ ** يهدر يعاند قوّة الشوّاطي
يا صاحبي حيران ما تقدر اتطول فحل ** غير تو تمشي بالقفا الأوقاتي
ويمكن تشوف الفار هاجم صل ** والجيد باسم اللايشين يهاتي
ويا صاحبي شقلب كيان الكلّ ** نخاف نتكلم تنجرح لهاتي
وبيغاذ يطفح فاض كان انزّل ** قادر يسويها جبل وشاطي
وزيّك سكني في الجواجي غلّ ** والغل يسكن كان راجل عاتي
باقي العلوجة الساكنه في الظلّ ** كلاب ضالّه تدغر على الملفاتي
ومازلت باطي ومازال ريحي مابغاش يواطي ……….

*****

مازال ماضي حدّي ** ومازلت واقف عل قوايم قدّي
ومازال ريحي ما بغاش يهدّي ** يعصف ويسوي العالية بالواطي
ومازال بحري فاض موجه يدّي ** لا فيه مرسى ولا عليه شواطي
ومازلت نرزم بالقوافي نسدّي ** نثبّت وحاكم غرزتي ورباطي
ومازلت في الميعاد فايح ندّي ** دلالات في صمّ الحجر بصماتي
ومازلت من سوق البلي متعدّي ** صيود الوغي تجفل تهاب عياطي
أنا من سلالة بو جبين مندّي ** اللى لغير ربي لا ركع لا يطاطي
حني من كسب لشقر وليه تجدّي ** رجال تنكسر تركع قداه تواطي
ومازلت باطي ومازال ريحي مابغاش يواطي …….

*****

ومازلت في الأبعاد ** ومازلت نقطع واد نلقى واد
ومازال بي يميعد الميعاد ** وحتى الصدق في غيبتي متواطي
وعودي قدي دخن برد سواد ** سواد من لهايب شاعلاله واطي
ومهري شرد وتقطعت الأمراد ** وميّحت زادي طاح من مخلاتي
والأيام حكمت ع الكبير إنقاد ** والأيام لا واطت تزيد تواطي
والأيام ديره وحايفه وجدّاد ** والأيام لعبت خربقة غلّاطي
والأيام هي اللي شيّبت الأولاد ** وعاد المهطّي يقول هذي وطاطي
ومازلت يا سود الهذب نشّاد ** وننحب على اسمك وبيه انهاتي
ونقطع برور الواسعة وأسناد ** مزازات في مزازات برّي خاطي
و يوقد الواقد ما ضنوه أجواد ** و توصل رحلة سفينته للشّاطي
ونار ال قدت تقعد عقاب رماد ** و يقعد الواطي طول عمره واطي
ومازلت باطي ومازال ريحي مابغاش يواطي …….

*****

مازلت زي العاده ** تايب و ما نترك فروض عباده
لله راكع ما معاه اسياده ** يغفر ذنوبي و سيتي و اغلاطي
و مازلت نفتح للغشيم اعقاده ** اندل شور من تلّف ثنيتا خاطي
معروف رايي بحكمته و سداده ** قليل وين تخطى حسبتي و قصاّتي
و مازلت نقصر رقبتي سدّاده ** قاعد ذراعي حصن عل مطلاتي
و مازلت كاسر شوكة القوّاده ** كالسّيف نقطع رقبة المتواطي
حني من ينادوا باسمهم ردّاده ** يوم الفزع اقابلوا الشوّاطي
و الشعر لنّا بحجته و شهّاده ** ورثناه ملك الجد موش امعاطي
ماناش ملّي يدججوا مثراده ** و ماناش ملّي يقلفطوا بلفاطي
حني لا وقفنا تركع الهنّاده ** تزغرط مع الّي دايرات قطاطي
و الصّقر ديمة في العلي يتماده ** ما ينزل منازل بومها عيّاطي
كثر الدوي ما تعود من افاده ** غير جرني قول الحديث مواتي
ومازلت باطي ومازال ريحي مابغاش يواطي …….

******

مازال راسي حي ** و مازالت عن النّايباتت قوي
و مازلت إلى انساقت البل انجي ** و نعرف سرايا الغايرين هلاطي
و مازال ما فيّاش عرق بلي ** و دم الحياة يضخ في نبظاتي
و الشمس ما يوفاش منها الضّي ** و غير السحاب اليوم ولّا واطي
مكاتيب وين حاد النظر اعمي ** يدهدص يدلوا فيه بالمنعاتي
و مازال سري طاويينا طي ** وماهما توفا قداهم عزقاتي
و كل من مشي منهم يعيّط وي ** و كل من خطى ما يفوتشي خطواطي
و مازال البي طول عمره بي ** و قصر المحبه يبان فوق الشّاطي
ومازلت باطي ومازال ريحي مابغاش يواطي …….

*****

مازل عندي عز ** و انقول هاذي لخره و تحتز
نلقى المضايع دايرين ملز ** وبل اللقايط كثرها غلّاطي
بل اللقايط وين ما تنحز ** يريح الفحل و تضيع هي هتاتي
و القلب لا يضعف و لا ينهز ** و معروف منهو البينا هنداتي
و يا صاحبي ضرع الشوي لا غرز ** تعب الحزازي و قال هاهي عصاتي
و تقربعت ما بين قربة و خز ** و خزّانها في الصيف موش مواتي
ولاد أصل لا ضامه الدرك يهز ** و يروي عطش ال كالحين اصماطي
و انجود مالموجود ليه انفز ** ركوب الخطر و الخيل و امهاجاتي
و الصبر في قلبي بني و ركز ** و م البعد نعرف سيمتي و بكراتي
غير وقت و انبلّت غماها الخز ** و الأيام عندي ماشية و تبساطي
ومازلت باطي ومازال ريحي مابغاش يواطي …….

*****

مازلت في التغريب ** و مازلت نقتل ذيب يقعد ذيب
و مازال في وسط الكنين نحيب ** اذا اتطفيه يردف خوه قبل امباتي
و مازلت بين الصّايبة و العيب ** موقّف قماير حاكمتها زلاطي
و بالعمر ما يقولوش وسطي اش جاب ** و باب الطمع مقرطا بقراطي
و الجرح بيرا ع الدغر و يطيب ** و ما نخفضوش الراس للي يواتي
ومازلت باطي ومازال ريحي مابغاش يواطي …….

*****

كيف كيف بكري و تو ** و تقعد منارة لياد كان الجو
و تقعد رساوي البيت عند النّو ** و تقعد رفيق الدرب طول حياتي
ناي صاحبك في خير ولّا سو ** و في كل حالة معاك ديما واتي
و يا صاحبي الألياش كان رمو ** يسير سهمهم ما يطولش الي يواتي
و لرماق مهما باللباس علو ** كيف كيف هم و اللابسات اقطاطي
و يا صاحبي الأوقات كان مشو ** صعيب يرجعوا و يصعب فلك أبياتي
و يا صاحبي الأوقات كان حلو ** جرّبتهم يا ما حلو أوقاتي
و شربت منهم مر بيد عدو ** في صوب صاحب سببوا عثراتي
انجرح اللحم لكن عظامي انجو ** ما دام عظمي سلم حزت نجاتي
ومازلت باطي ومازال ريحي مابغاش يواطي …….

******

كيف كيف حتي ان هب الريح ** حتى بطيت و نعرفك ما تريح
صامد جبل ما تحرككش الريح ** قوافي الشعر بيك اتهاتي
و زيك نباتي من نبات الشّيح ** ولد أصل منبت خيار انباتي
خلّي الضواري دايين ضحيح ** فايح دواء و ذاتك يكمّل ذاتي
يجي يوم و زميم الكلام يطيح ** خل ينبحوا مادام النبيح امواتي
حني من سكننا قفار و ضحاضيح ** ينداس و يدوسه قدم صبّاطي
حني من انقولوا في المليح ** حني يلي رمينا رمينا ثبّاتي
حني اليا دخلنا في طريق مليح ** حني من انقولوا للتواطى واطي
و ساعات يجبدنا الهوى و مليح ** و في المدح نذكر كاملة الأنعاتي
يا بو قصيدة نور و مصابيح ** ابصم مغمّض تتبعك بصماتي
ومازلت باطي ومازال ريحي مابغاش يواطي …….