غوامض ما بعد الثورة

كيف كل عام بين شهر ديسمبر و جانفي يبدا موسم الثورة: بين مؤيديها و اعداؤها. 

ونتذكرو الي عندنا برشا أسئلة متجاوبش عليهم لتو و تبدأ التحليلات: ثورة ،انتفاضة ،مؤامرة ،انقلاب ،أمريكا، فرانسا، قطر الخوانجية، التجمع…..

 انا كل ماندور على الفايسبوك نستغرب حاجة، في الخضم هذا بكلو نلقو سياسيينا، صحافيينا، محللينا و كل فايسبوكيينا عندهم ميزة مشتركة: سرعة النسيان !!!!

بعد بعض السنواة، عشنا فيهم تاريخ مليان أحداث أكثر من الي عشناه في 50 سنا الي قبلهم، تسارع تاريخنا بدرجة كبيرة: 9حكومات، 3 رؤساء جمهورية ،زوز انتخابات تعددية ، آلاف التنظيمات ،عمليات ارهابية  ،قضايا كبرى ،تحولات دولية ،رأي عام… تبدل وضعنا و تبدل مسار تاريخنا بالباهي أو الخايب. المهم تبدل بسرعة كبيرة و جوجمنا لدرجة انو نسينا فيسع، غوامض الثورة. 

من بعد 14 جانفي 2011 صارت برشا أمور غامضة و مش مفهومة ابدا و فيسع ماتنسات و تعداها الوعي كأنها ماصارتش .

ـــ في المقالة هذي بش نحاول نلمد قائمة غوامض ما بعد 14 جانفي 2011.. 

1. القناصة :

 هذا أولهم، حد ماهو فاهمهم: عندنا قتل في الثورة مشكوك انو قامو بيه مرتزقة و عنا قتل بعد 14 جانفي و فيه اصلا جنود  ماتو و مش فاهمين شكون قتلهم.

يقولو: فرق اجنبية تابعة الطرابلسية  أو أوفياء بن علي و ناقمين على الشعب أو أمن رئاسي … 

=> كل الكلام هذا ضبابي و وراه كان الأسئلة و الأهم بدون أي مجهود من الحكومة للإجابة عليهم والحجة الي قالها السبسي هي “القناصة إشاعة و الي يشد قناص يجيبهولي”. 

1. الإرهاب :

 الشعانبي، سوسة1، سوسة2، باردو، جبل السمامة، الروحية، بن قردان : عندنا هجومات على الجيش + قتلان سواح + تفجير كار الأمن الرئاسي …. 

كانت هجومات على الدولة بدون تنظيم واضح + بدون بيانات مسؤولية + بدون مطالب ==> إرهاب اعتباطي. 

 عندنا شكوك كبيرة في تورط: إطارات كبرى بوليسية +قادة أحزاب +رجال أعمال +دول أجنبية  +…. . و لكن عندنا رئيس جمهورية قال بعد ضربة سوسة “هذا لكلو من جرة حملة وينو البترول”  معناها فما شك في إنو الإرهاب عندو علاقة بالفساد. اما كلو تخمين و كلام لأنو : الأمن والقضاء والصحافة ماعملوش يعملو بحث جدي لكشف الحقيقة.  

1. محاولة اغتيال رضا شرف الدين : 

هذي كانت أقوى لقطة، اكثر من 30 كرتوشة تضرب كرهبة رضا شرف الدين : رئيس النجم الرياضي الساحلي ،مالك شركة انيماد للأدوية و نايب في مجلس الشعب عن نداء تونس. محاولة إغتيال تضحك ياسر اما هو متمسش ابدا !!! 

و حد ماهو فاهم، اذا حبو يقتلوه و الا يخوفوه والا هو صنع الفيلم؟؟ شكون ها القاتل الأحول؟؟؟ شكون الفاعل ؟؟؟؟ و شبيها الحكاية طفات فيسع ؟؟

1. الجنون المؤقت لبن غربية :

معز بن غربية ادعا انو يعرف قاتل بلعيد و البراهمي، هرب من تونس و أعلن انو مهدد و انو بش يقول على القتلة و لكن مفم شي، ويرجع لتونس يقولو الي هوا هبل ويسيبو القضاء، ويمشي يحل قناة فضائية!!!

1. وثايق بنما : 

انكيفادا موقع تونسي تابع للاتحاد الدولي للصحفيين الاستقصائيين نشر انو  محسن مرزوق راسل مكتب محامات بنمي يساعد في تهريب الفلوس. و قال انو فما غيرو برشا توانسة مهربين فلوسهم في بنما. 

 لكن من بعدها سكت تماما كينو مات و اللجنة الي عملها مجلس الشعب و كذلك القضاء ماعملو شي و تنسات الحكاية تماما!!

6. الشخصات النافذة :

 بعد الثورة سمع الشعب التونسي “بكمال اللطيف” رجل الخفاء الي يحكم في: سياسيين، أمنيين، صحافيين، إطارات كبرى و الي يظهر كيف الساحر: قوي وشرير و مايعرفو حد. أصلاً وصل ضرب بوليس بكرهبتو الي جاو بش يشدوه و ماصارلو شي. و اصلا يقال انو ينجم يعطي أوامر للإطارات العليا في الدولة باش يتبعو و تتجسس على عباد.. رجل فوق الدولة. 

 شفيق الجراية كيفو بالظبط اما بأكثر حس و الزوز في صدام و عندهم اتصال بالناس لكل و موكلين برشا :أحزاب، مؤسسات اعلامية و مسؤلين كبار و عبرهم ينجمو يعملو جرائم كبرى و حد ماينجم يحاسبهم .

تحسو جو العصابات الي يزيد يحسسنا بالغموض. 

ممكن نكون نسيت حاجات، اما حبيت نذكر لنو لازمنا نتذكرو،نتساؤلو ،نحللو و نحاولو نفهمو على قدم منجمو آش صاير عندنا قبل مانخممو في تبديلو، نحتاجو المعرفة و الفهم لأجل نجاعة الإصلاح. 

Views: 0