الميولات السلوكية السياسية عند التونسي (عددها 12)

ــ في الوضع الحالي المتردي تماما وين مافما كان :الفساد، المديونية، التبعية، الذل، الضعف و التخلف . وين جزء كبير من الشعب يبكي من “الفقر”،”البطالة” و تدهور الوضع الاجتماعي.وين فما “ضياع تراث” و “انحطاط ثقافي” . في الوضع هاذا وين مانجمو نقولو كان :خلي عزاها سكات.

فإنو التوانسا ينقسمو لأنواع :

ـــ 1. “الي ما علبالهمش” :

لعدة اسباب الوضع ميهمهش ابدا، مايقلقهمش، مايضرهمش !!! و ماهمش مهتمين بتاتا ب”تونس” .هوما تويكا عايشين فيها كهو و مهما كان الي بش يجرالها “معلبالهمش” ،الله اعلم منين جاتهم “برودة الدم” هاذي اما “متحكيش معانا” و كهو .

ــــ 2. “الندابة” :

هاذم فئة مكبشين انهم “تندب الماضي” مهما كان “الماضي” : “ثورة البرويطة” ،”يرحم ايامك يا بن علي” ،”كنا خير قبل”، “كنا شباعى” ،”طز في الحرية”، “بورقيبة خير من بن علي” ،”كان مستقليناش كان خير” ،”ولله كان ترجع فرانسا خريلنا” ==> بالنسبة ليه الماضي ديما خير و كل منقدمو كل ما اوضعنا تفسد “الاستعمار” خير من “الاستقلال” ،”بورقيبة” خير من “بن علي” و “الثورة كارثة” و”تونس مشات”، “تونس ضاعت” ،”يا حسرة على تونس” و البكاء و العويل…

ـــ 3. “السبابة” :

الي قال، “تونس” :نعل بو الجد بتع بوها ،تونس متجي شي ،تونس متسوا شي ،تونس بكلها على بعضها :شعب/دولة/أرض :اخيب بلاد في العالم . بلاد كلبة.

( يتقال كلام آخر في الحقيقية) ، شعب “*****” ، بهيم، متخلف ،سياسيين فاسدين. “اذا حللت بافريقية فوافق او نافق او غادر البلاد ” و عندهم “مجلدات سبان،تحقير ،اهانة” ل”تونس” :ظبوط القردة ،بلاد الثعالب و مستوى متدني لأحط الدرجات من “السب” و يتقنو كان :اهانة،تحقير”تونس”.

ـــ4. “اليائسين” :

“تونس” مستحيل تنجم تعمل حاجة،”تونس” معادش فيها امل ،تونس وفا عليها الراي .”تونس” مشات تزمر .”تونس” شبقا فيها انتهات للابد. “تونس” معادش تتصلح لقيام عيسى.امورنا بش تقعد هكا للابد. مستحيل “تونس “تنهض مستحيل و متنجمشو كان نجمت ميخلوهاش “باهي هكا؟” !!! “تونس” شتقعد هكا :متخلفة و ضعيفة و محكوم فيها و متنجمش تقنعني بالعكس.

ـــ 5. المستسلمين :

الله غالب هاذا شحب ربي معنا منعملو ، نشالله تتصلح احوال لبلاد ،تو احنا الشعب الزوالي شنجمو نعملو .السياسيين فاسدين علخر و الشعب مسكين يتحمل النتيجة .هوكا الشياب تحكم و الشباب يحرق .منجمو نعملو شي ،هانا ثرنا شتبدل متبدل شي ،لذا نسكتو و ندعو ربي يصلح الاحوال و يخزر لهآلبلاد و يمنعها .ما عاد عنا كان الدعاء . تويكا نبلعو السكينة بدمها و زايد الكلام ،كلو زايد . كل واحد يمشي يشوف روحو و البلاد هوكا ربي يخزرلها و نشالله يلطف بيها .

ــــ 6. “الهاربين” :

العمر قصير و منجموش نضيعوه في “مشاكل تونس” :انا نحل مشاكلي و انتي حل “مشاكلك” ننصحك فك عليك متضيعش عمرك علحكاية فارغة. علاش احنا بالذات نهزو مسؤولية تونس ؟؟ شبيهم باقي التوانسة ميحسوش ٱخي بلادنا احنا كهو .بصراحة “مسؤولية التبديل السياسي” منجمهاش،منجموهاش ،يحبها “وقت” و “فلوس” و دعم :امور معناش منها ،وضعنا صعيب و كل واحد يمنع روحو يا اخي .

ــــ 7. “المنافقين” :

انا نحب تونس و نموت عليها و كل شي :تاريخ/حضارة/بلايص/ماكلة :محلاها تونس و لازم نبدلو ،لازم نعملو برشا حجات . اما سامحوني راني تويكا لاهي :عندي مشاكل اقتصادية،عايلية، و نفسية( انفصام في الشخصية) و لذلك منجمش نتواجد في حتا حركة سياسية لأجل التبديل اما تو نعاونها من برة .ايه ب”الدعاء و الامني القلبية” و ممكن ممكن انجم نعمل “جامات عالفايسبوك” كان لقيت الوقت (بالرسمي، الكلام هذا منقول حرفيا).

ـــ 8. “الشقنوسيين”:

ايه هاذا هوا لازم نتحركو ،لازم نعملو حاجة،معادش فيها ،الحكاية مستعجلة علخر .لازم ناقفو لبلادنا، لازم ناقفو لتونس ،لازم نثنو الركبة، لازم لازم لازم . هاذم عندهم اكبر النفحات و لحظات الحماس الفياض و لكن من بعد : معنديش وقت لقراية الكتب ،تفكير نظري برشا يتعبني ،نشاط دايم منجموش عندي “سهريات” و “قعدات” مستعجلين. مش لازم ديما سياسة ندوروها :ثقافة، رحلات، قهاوي ، تصاور و فازات مش خير؟!

ــ9. “المستهترين” :

شوف انا مع “النشاط السياسي” و الي هوا و انقلاب و ثورة مسلحة كان لزم اما راو :قراية كتب، جيان بكري، تنظم، قواعد و التزامات “متحكيش” :انا نفيق امخر، انجم نكذب بسهولة، ممكن نقرا ربع كتاب، تفكيري سطحي علخر و الاستكباس ضدو :نحب حاجة كيما “ماطشوات الكورة” بالكيف علخر بتع “جو شباب ” متكبسش عليا راني نفد و نقلق . السياسة بالكيف مهيش “هندسة “راهي كيما “الخربقة” :لعبة زهر وحقا :الالتزام و الأخلاقيات سيب علينا منهم راهم يفددو و مايجي معاكم حد.

ــــ 10. “الرافضين لوجود “تونس” :

اه خويا كيف تجي للحق :تونس هاذي مكارهاش موجودة ،خلقها الاستعمار، تي وقتاش جات و منين جات “تونس هاذي” :نتفاهمو من تو هاو نعطيك الصحيح ،اسمعني عاد هاو الصحيح : فما “امة عربية”و الا “امة اسلامية” و ممكن “امة امازيغية” في وسطهم تجي “تونس” :اما وحدها مستقلة،وطن،شعب،دولة و “امة” من فوق :لا سامحني ميجيش منو و هاذي “نظريات استعمارية” وضعتها “فرانسا” و “القوى الدولية” بهدف ضرب و تقسيم :العروبة،الاسلام و الامازيغية . ويتهمك “انت راك :صهوني امبريالي، علماني، عروبي، اسلامي …..” (حسب نوع الوحدة المقصودة تكون السبة ).

ـــ 11. “الباقي”: المحبين لتونس :

هاذم فئة خاصة علخر :مهتمة بتونس لأنها “وطنها” و مستقبلها بكلها فيه و مهيش ناوية تخرج . تحب تونس “الحب الطبيعي” :حب الإبن لأمو لأنها بلادها بكل بساطة.تحترم تونس كيما “أمها” لكن :معندها حتا راي سياسي في حتا مسألة و مش عارفة شتعمل .وصادقة علخر في هاذا :مهيش فاهمة السياسة اصلا .تتمنا الوضع يتصلح و عندها امل في المستقبل كيف يتلم الشعب التونسي و يركز في مشاكلو ولكن متعرفش كيفاش .لذلك فإنها تقعد اتبع الواقع اكاكا مغير فهم و تلعب بيها وسايل الاعلام و تهزها ل”الانواع الاخرين” . هاذم هوما “البكر” اي الي مزالو معملو حتا موقف و مزالو “على نيتهم سياسيا”.

ـــ12. “الحربيين” :

هاذم زبدة الزبدة بتع “تونس” و عددهم صغير علخر . عندهم أهداف يسعولها بكل جدية و حماس ،يخدمو في اي مشروع بقلب و رب و حتا لوفشلو يعاودو من اول و جديد. عندهم ثيقة في رواحهم و ايمان ب”تونس” انها تنجم ،يواجهو في كل شي، في عراقيل من كل الانواع ،يطيحو و يقومو . يصبرو يتحملو ،يراجعو رواحهم و يقدمو ديما لقدام . عندهم نفس طويل و روح مثابرة علخر : جديين ،مكافحين و عصاميين يعملو على رواحهم و يحبو “تونس” تولي تعتمد علروحها في كل شي :عندهم أهداف، رؤية، خطة ،نظام و عزم و قاعدين يحاولو يتقدمو بلي اينجمو و كل يوم يحاولو تجاوزو الماضي و يخلقو الفرصة.

**ملاحظة:

اتباع التيارات السياسية بما فيهم “القوميين التوانسة” محسبتهمش لأنهم.. أولا “أقلية” و ثانيا لأنهم يتوزعو في 12 نوع هاذم والي يتواجدو في كل التيارات بدون إستثناء. ‏

Visits: 71