آش نعملو بالسياسة؟ تونس بلاش فكر سياسي يقود قاطرة التقدم

ثما برشا ثقافات انسانية عملاقة من جميع النواحي علميا ،تقنيا ،فنيا و فلسفيا كيما الحضارة الهندية ، الصينية و المصرية القديمة لكن في كل العصور السابقة ( قبل القرن العشرين) نلقو الصين و الهند و مصر كانو عموما ضعاف علخر عسكريا و سياسيا قدام الأجانب و المحير في الأمر انو الصين بلد الفنون القتالية الممتازة و مبدعة البارود تكون ضعيفة عسكريا و تتعرض للغزو الدايم في عهد حروب السيوفة لهنا تخليكم و حدكم تحطو ملايين نقط التعجب! و تتسائل :
علاش ؟

لأنو الفكر السياسي كان ضعيف عندهم و هذا الي بش نوضحوه هنا:
     العمل السياسي أساسي و حيوي في حياة الامم كيما العقل في حياة الشخص بالظبط و كيف نقولو عمل سياسي يعني أفراد حاملين لفكر سياسي و يسعو لتحقيقو.
     الفكر السياسي هو نظرية الدولة ،مفهوم الدولة ،قيمة الدولة،شرعية وجود الدولة ،معايير تقييم الدولة، كيفية بناء او تأسيس الدولة ، معايير قوة او صحة الدولة و الأهم كيفاش لازم تكون الدولة أو غاية الدولة.
و بما انو الدولة هي الجهاز المتحكم او شبه المتحكم في الحياة العامة للأمم كيما المخ في البدن. فإنو فكر سياسي معين ينجم ينهض بأمة من الحضيض و كيما فكر آخر ينجم يحطم أمة و هي في القمة.

     الفكر السياسي هو المكلف بتوجيه مجهود الأمة عبر حكم الدولة و لهنا ننتبهو مليح مليح . تنجم تكون انسان كفئ و ماهر و لكن تعجز علخر على استخدام كفائتك فيما ينفعك و انسان يكون اقل مهارة منك لكن يحسن استخدامها و ينجح خير منك و هذا لنو هو يتقن التصرف و يعرف يستخدم مهاراتو أو مواردو بنجاعة .
    في عالم الدول المر كيف كيف الامم تختلف برشا في الموارد و العبقريات و لكن السباق الاقتصادي، العسكري و السياسي مرهون اساسا بالعبقرية السياسية .

     أصلا التقدم العلمي التقني اساسا ينمو علخر و يتم تثمينو و تمويلو لأسباب سياسية بحتة و كيف كيف التعليم .و لهنا نفهمو انو الامم الي دولها معندهاش طموح سياسي و نركز على #الطموح_السياسي علخر. الأمم هذي كيما بولوني والصين و الهند رغم مساهمتهم العملاقة احيانا في تطورات علمية تقنية هامة لكنهم تعرضو للإحتلال و ممكن التخريب و التدمير و الأهم من هكا عمرهم مستفادو من ثقافتهم بل إستفادت منها أمم أخرى.

شنحكيلكم حاجة:
      تسمعو بهجرة الأدمغة الي هي ظاهرة قديمة علخر .
عندنا في تونس إعتقاد غبي انو الادمغة تهاجر على جال الفلوس للخارج. للامانة أهم الأدمغة و العقول الكبرى تهاجر لأسباب إنسداد الأفق قدامها في دولها الأصلية. و مثال بسيط الهند: الدولة وفرت فيها رفاهية أقل من أمريكا للعقول و لكن الهند بعد الاستقلال قدمت مشروع عملاق للعلماء أو المهندسين الي وهو القوة العسكرية و هكا بمجهودها الخاص إكتسبت القنبلة الذرية و الصواريخ العابرة للقارات و من غير مانحكي عل التقدم الاقتصادي .

      أنا لهنا ديما نسترجع المثال الشهير لغوليلمو ماركوني مخترع أجهزة الاستقبال و الارسال اللاسلكي هو إيطالي و عرض مشروعو على الحكومة الإيطالية الي ماراتش فيه فايدة ( لغبائها السياسي) و كيف عرض الإختراع على الانقليز مولوه مباشرة، ايه مولتهولو انقلترا بلد العبقرية السياسية و الاقتصادية و العسكرية و الي نتج عليه من بعد أول اذاعة و أول تلفزة و أول رادار.
بش نزيد هنا انو بريطانيا كانت البلد أو الدولة الأقل موارد من جميع ما. و في 1100 ميلادية كانت الأقل سكانا و الأفقر لأكبر درجة و متخلفة تقنيا مقارنة بالمدن الايطالية و لكن بدات تتقدم بفضل الدفع السياسي لقرون و لهنا يجيو دور العامل السياسي في التقدم.

    اي تحبو اليابان و امريكا وألمانيا؟ من لخر اي دولة قوية او متقدمة هي نتيجة #إرادة_سياسية و عبقرية سياسية #الإرادة ضرورية و العبقرية زادا. و من هنا تجي أهمية الفكر السياسي الي نراه أهم فكر لازمو يتقدم كمرحلة أولى .

فهم السياسة الحقيقية:
    يكون إنطلاقا من التاريخ و الاقتصاد والحرب و من بعد العقايد السياسية هو الكفيل وحدو ببنيان الوعي السياسي القومي التونسي و من بعد تجي الارادة السياسية التونسية.

     لهنا للأمانة بعد كل قرائاتي لقادة التيارات و الأحزاب التونسية من الاسلاميين، عروبيين ، ماركسيين ، حقوقيين ، تحرريين نلقاها صفر فهم سياسي و نلقاها شعاراتو شكاوي و تنظيرات خيالية و الأهم من هكا بلاش وعي تاريخي و 0٪ إطلاعات على الفكر السياسي الانساني و إنما استيراد و نقل عادة إسقاطي لعقايد سياسية أجنبية أنا نأكد و نبصم بكلي إنو مستوى الفهم و الاطلاع السياسي لكل نخبتنا الحالية ما يرتقيش ل خير الدين باشا و هذا حسب رأيي البسيط مزالو ما قراووهوش .

     في #القومية_التونسية نعتبرو #البناء_السياسي و تحديدا اعادة مأسسة العمل السياسي هو أولى المهام بتاعنا و أولية الأولويات و يبدا من المبادئ و القيم السياسية للبرامج السياسية و لذا فإنو نحتاجو علخر لنشر الوعي السياسي لأنو القومية التونسية هي وعي جديد وعي ثوري و تقدمي .

Visits: 441