انت مكش وطني اذا كنت:……..

– ساهل علخر الادعاء و التظاهر بالوطنية , لكن الوطنية في جوهرها العاطفي-الاخلاقي هيا تقديس للوطن,مصلحة الوطن ,عزة الوطن و عظمة الوطن .الوطنية /القومية التونسية هيا عاطفة و قيم ينتج عليهم سلوك فعلي و ممارسة سياسية –اجتماعية ولذا فإنك:

– مكش وطني كي متعتبرش المصلحة الوطنية العامة اهم و اولى من المصلحة الذاتية الفردية.

– مكش وطني اذا كنت تخزر للسياسات ,الاحداث و التيارات الفكرية-الحزبية على اساس المصالح الي بش يرجعو بيها عليك مش المصالح الي بش يحققوها للوطن في العموم.

– مكش وطني كيف تساند او تتعاطف مع المطلبية الاجتماعية ,المحلية ,الجهوية ,النقابية ,الفئوية ,القطاعية و الانانية مهما كانت الحجة و المبرر وقتلي تبدا الدولة في ازمة ,لحظة ضعف و انهيار.

– مكش وطني كيف تتبنا فكر او تتعاطف مع فكر يدعو او ينظر لالغاء وطنك التونسي و دمجو في وطن اكبر عربي ,اسلامي ,امازيغي ,متوسطي اوغيرو باي حجة كانت.

– مكش وطني كيف ترا انو تونس متنجمش تولي قوة عسكرية ,اقتصادية و سياسية عظمى في هاذا العالم و تاخو دور عملاق في تحديد وجهة التاريخ الانساني.

– مكش وطني كيف متقلقكش ,متغششكش , متحيركش الاعتدائات و الانتهاكات الاجنبية للسيادة ,الكرامة و الشرف التونسي.

– مكش وطني كي متكونش مستعد لتقديم التضحيات و التنازلات على المصلحة الخاصة مقابل المصلحة العامة و خاصة مقابل تحقيق السيادة ,العظمة و المجد التونسيين.

– مكش وطني كيف تحتقر او تستهين بالتاريخ التونسي و ترفض الاطلاع عليه و التمكن منو بأي حجة كانت.

– مكش وطني كيف ترا انو دور تونس التاريخي هوا مجرد “نزل” او “مقهى فاخر” تلتقي فيه الحضارات و انها لازم تكون صاحبة الجميع و بشوشة مضيافة للجميع و بدون اي قوة عسكرية-اقتصادية –سياسية تخليها صاحبة موقف مسموع و فاعل في السياسة العالمية.

– مكش وطني كيف تبرر او تطبع مع التدخلات الاجنبية ,القروض و المساعدات الاجنبية و خاصة المؤامرات الاجنبية.

– مكش وطني كيف تساند اي تيار فكري-سياسي تابع للخارج فكريا ,سياسيا او ماليا .مكش وطني كيف تتعاطف مع تيار سياسي يتعامل مع السفارات الاجنبية او متموقع في صراعات المحاور الاجنبية في تونس.

– مكش وطني تقص الكياس ,تعتصم في مؤسسة عمومية ,تشل مؤسسة عمومية ,تخرب املاك عامة او خاصة تحت اي حجة كانت اجتماعية ,حقوقية ,محلية ,جهوية او دينية. – مكش وطني كيف تنتمي او تتعاطف مع تيار فكري خارجي او مركز قيادتو في الخارج تحت اي حجة كانت بما فيها الحجة الدينية او الانسانية.

– مكش وطني كيف تشري سلعة اجنبية و فما مرادف تونسي ليها ارخص منها بجودة مقبولة .- مكش وطني كيف متراش انو الدولة التونسية لازمها تكون قوية من كل النواحي العسكرية ,الاقتصادية ,السياسية ,العلمية ,التقنية و انو الشعب التونسي بكلو لازمة يقدم كل انواع التضحيات بما فيها الدموية علجال هاذا.

– مكش وطني كيف متعملش مجهود لنشر الفكر و القيم الوطنية الحقيقية وسط محيطك الاجتماعي بكل الطرق الممكنة.

– مكش وطني كيف متراش “الوطنية ايمان ,التزام و تضحية” مش كلمة تتقال بالفم و تقعد حدها حد الشفايف و يهزها الهواء.

– مكش وطني كيف متعتبرش القضية التونسية اولوية مقدسة في حياتك و تحضر روحك للتضحية على جال تونس وقتلي يقتضي الامر ذلك.

– مكش وطني كيف تقعد فرايجي قدام الخيانة ,العمالة ,الفساد ,التدخلات الاجنبية ,التبيعة للخارج و كل عوامل الضعف التونسي و متحاولش تنضم لتنظيم وطني يحاربهم او تاسس تنظيم وطني يحاربهم.

– انتي مكش وطني كيف متشجعش فريق رياضي تونسي يلعب في مسابقة خارجية بحجة انك من احباء فريق تونسي آخر منافس ليه.

– انتي مكش وطني كيف تبدا تقلد في المظاهر الحضارية الاجنبية : لبسة ,ماكلة ,مناسبات و نمط حياة سواء كان هاذا النمط غربي او شرقي شمالي او جنوبي.

– انتي مكش وطني كيف تبدا تحب نادي رياضي اجنبي ,تتعصبلو و تلبس مراولو و رموزو.

– انتي مكش وطني كيف ترا انو الانتماء العايلي ,المحلي ,الجهوي ,المهني ,الجنسي ,الديني او غيرو من الانتمائات يجي قبل ” الانتماء الوطني” مهما كانت حجتك .انتل مكش وطني كيف متراش الوطن اهم ,اولى و اقدس من كل الانتمائات الاخرى بدون استثناء.

– انتي مكش وطني كيف تكون يائس من التقدم التونسي و تولي خائن كيف تنشر يئسك و احباطك وسط الشعب و تساهم في تحطيم المعنويات العامة.

– انتي مكش وطني كيف متراش انو ضعف الدولة التونسية هوا ضعفك انتي و انو انتهاك سيادة /شرف الدولة التونسية هوا انتهاك سيادتك و شرفك انتي و انو الذل /العار التونسي هوا ذل و عار ليك انتي .انتي مكش وطني كيف متتوحدش مع القيم الوطنية و كيف متحسش انو الي يمس تونس يمسك ,الي يعزها يعزك ,الي ينفعها ينفعك و الي يخربها يخربك .

– انتي مكش وطني كيف متخصصش وقت و جهد للاطلاع على تاريخ تونس ,تراث تونس و لفهم حقايق السياسة التونسية و محاولة التفكير في الحلول التونسية لاكتساب القوة و التقدم الفعلي العلمي –التقني و الاخلاقي زادا .

– انتي مكش وطني كيف تشري سلع مضخمة اجنبية يفرهدو حياتك و ميرجعو بحتا نفع حقيقي للدولة /الوطن التونسي .انتي مكش وطني كيف تخرج فلوسك من تونس في حجات مهيش ضرورية او اساسية للحياة و التقدم .

– انتي مكش وطني كيف متراش العلم التونسي مقدس و انو احترام الدولة ,القانون و المصلحة العامة التونسية مقدسين و مكش وطني كيف متراش انو من واجبك مواجهة اي اهانة توجه للعلم و الدولة/الوطن التونسيين.

Hits: 40