من أجل ريجيم قاسي و مؤلم لبنيان دولة قوية تسود

من أجل ريجيم قاسي و مؤلم لبنيان دولة قوية تسود

#شحم_الدولة / تخفيض مصاريف الدولة


1 ? علاش الدولة ؟

الهدف الأساسي و الأول الي موجودين على خاطر كقوميين توانسا و على جالو أسسنا الحزب القومي التونسي هو: بنيان دولة تونسية حقيقية تجسد إرادة الأمة التونسية و نبنوها على أنقاض هذه الدولة الفاسدة، يعني دولة تونسية قومية ذات سيادة و قوية سياسيا، عسكريا، اقتصاديا، ثقافيا، تعليميا، تربويا، إداريا، رياضيا، إجتماعيا…

هذا الهدف الي حطيناه بين عينينا وهو “قوة الدولة” وقوتها كجهاز و أداة لممارسة السلطة هو الي بش يهزنا للقوة و التقدم في كل المجالات، و هذا علاش ديما في حديثنا نركزو بارشا على تنظيم الدولة و قوانينها و ماليتها و مداخليها و مصاريفها و إدارتها و طريقة خدمتها و أسلوب خدمة الي يحكمو فيها أو المؤثرين على اتخاذ القرار في الدولة.

الدولة نخزرولها كجسد حي تنجم تنمو و تكبر و تقوى كيف ماتنجم تضعف و تموت و تنجم تكون سيدة كيف ماتنجم تكون تابعة للي أقوى منها.
نجو للدولة التونسية متاعنا اليوم، الدولة هذه الي عايشين في ظلها، مايختلفوش اثنين انها دولة فاشلة و فاسدة للنخاع و عاجزة على على مشاكلها و سيادتها مخترقة و تتسول في المساعدات و الهبات الأجنبية..

2? علاش هي سمينة و مشحّْمة ؟

الدولة هذه على ضعفها لكن حجمها كبير بالفارغ و سمينة بارشا كيف ماتشوفو في التصويرة، حجمها الكبير بعدد وزاراتها و ضخامة أسطولها الإداري بعدد موظفيها و الحجم الكبير لمصاريفها.. بحجمها الكبير تتدخل في حياة المجتمع و تشرف على الثقافة و الرياضة و تحب تراقب نشاط التوانسا و أقل بونية توجعها وبعض الاحتجاجات شعبية تنجم تهز سلطتها.

دولة مليانة بالشحم موش بالعظلات، شحم مرزنها و يخليها تتحرك بالسيف و مغرقها في إجراءات إدارية تعجيزية تعطل المشاريع و تعطل مصالح المواطنين، شحم سادد عروقها مايخليش الدم يدور ويخلي قلبها ضعيف في أي لحظة ينجم يسببلها جلطة ويقتلها، شحم يخليها تاكل بارشا تستهلك بارشا مصاريف.

3? في شنوة يتمثل هذا الشحم :

1\ فساد مالي و إداري:


أكثر حاجة تنجم توضح المشكلة هذه هي التقارير السنوية لدائرة المحاسبات، الي يحكيلك على تفاصيل دقيقة كيفاش تصير السرقة في فلوس الدولة من قبل الموظفين و المسؤولين و المتعاملين مع ادارات الدولة. و حكينا عليهم بارشا و حللناهم في عدة مقالات.
و اكبر المتورطين في الفساد هذا هوما رجال الأعمال الفاسدين و نقابات أعوان الدولة أكبر المتسترين و الحامين لفساد بارشا موظفين.

فساد مخسرنا في بارشا فلوس بآلاف المليارات و فشّل جل مشاريع الدولة و مخليها مقصّرة في أداء مهامها إذا موش معجزها جملة.

2\ عدد كبير من الموظفين :


أكثر من 800ألف عون دولة بين موظفين و خدامة القطاع العام يتكلفو كمثال عام السنا 16ألف مليار شهريات يعني تقريبا ربع ميزانية الدولة، ما يختلفوش اثنين انو اغلبهم كركارة و ديما فاصعين من الخدمة أو يتمارضو. هذا غير الي محطوطين في الفريڨو الإدارة يجي كل صباح يحل البيرو يقرى جريدة و يعمل قهوة على خاطر مالقاولوش خدمة.
في بعض الوزارات كمثال تلقى طابق كامل إسمو “الفريڨو” و نكتشفو في تقرير دارة المحاسبات و تحقيقات فساد كنا كنتبنا عليها حول وجود إدارات كاملة بموظفيها وفات الحاجة ليها لكن تبقى محلولة و موظفيها يخلصو، و كيف شركة البستنة و الغراسات الي تعملت ترضية للمحتجين و عملتلهم شهريات رغم الي عمليا موشيخدمو في شي.
و في أمثلة أخرى نكتشفو وجود أسماء أطفال و اسماء موتى أو عمال بالخارج و مسجلين يخدمو و تتصبلهم شهريات بشكل عادي.
و ماننسوش التفرغ النقابي الي يتمتعو بيه أغلب النقابيين وين يخدمو لصالح اتحاد الشغل و يخلصو من عند الدولة بصيغة غير قانونية.

3\ قوانين متناقضة أو قديمة :


هذا واحد من أكبر مداخل الفساد في بلادنا، وين تلقى قوانين تخالف الدستور، مراسيم وزارية مخالفة للقوانين، قوانين أو مراسيم متناقضة، قوانين قديمة لاتلغات و لا تنقحت، قوانين غير قابلة للتطبيق أصلا، قوانين تتعطل سنواة من غير أوامر تطبيقية كيف ماهو صاير حاليا مع مجلة الجماعات المحلية التو البلديات ماتنجمش تخدم بأغلب فصولها لغياب الأوامر الي بش يصحح عليهم الوزير.

المشكلة هذه تعمل حاجتين:

  • أولا هي اكبر مدخل للفساد و الي يعرف تفاصيل القانون التونسي ينجم يتحيل عليه بسهولة وكل مرة يستخدم القانون الي يتماشى مع مصلحتو و هذه يتقنوها بارشا إداريين و مديرين.
  • ثانيا هي تعطل بارشا خدمة الإدارة و تعطل معاها مصالح المواطنين وين تلقى روحك ساعات مطالب بش تجيب وثائق ماتطلبهمش إدارة اخرى كيفها او بين إدارة و إدارة تسمع كلام مختلف. أمثلة سبق و تعرضنالهم و كتبنا عليهم أكثر من مرة.

4\ حجم الجهاز الإداري و كثرة مصاريفها:


وزارات و كتاب دولة و دواوين و أكثر من 200شركة تابعة الدولة، من كبر حجم كل وحدة فيهم عادي تلقاها موزعة على 4و5 بنيات متفرقة وسط العاصمة اذا موش أكثر، إدارات مهامها متشعبة بارشا و ساعات صلاحياتها متداخلة.
جهازي إداري مكلف علخر، كراء و بناء و صيانة مقرات، مصاريف ماء و ضو و اوراق و تكييف و حراسة، مصاريف ايسونس و مازوط و صيانة قرابة 70 ألف سيارة وظيفية متاع آداء مهام منغير مانحسبو كراهب المسؤولين….

5\ إمتيازات المسؤولين:


بداية من مصاريف رئيس الدولة و الوزراء و كبار المسؤولين و النواب يلزم تصير عملية تنقيص في امتيازاتهم و منحهم، منها الزوز كراهب بشيفوريتهم لكل وزير و منهم 6قصورات على ذمة رئيس الدولة و منهم 4500عون متاع الرئاسة وحدها و منهم تمتع عدد كبير من الوزراء و النواب بالتغطية الاجتماعية و الانتريت مدى الحياة و منها إرتفاع شهرياتهم، و منها البيروات المضخمة و تبديل الأثاث كل فترة قصيرة…

6\ مصاريف الرياضة و الثقافة و الإعلام :


الدولة التونسية تنطبق عليها صفة “الدولة المانحة” بإمتياز، – منح للجمعيات الرياضية و مصاريف بناء و صيانة المنشئات الرياضية.

  • منح وزارة الثقافة للجمعيات لاقينها فرصة للسرقة بتظاهرات ماتسوى شي و مليانة شعارات ببارشا فلوس من غير نتائج، تويل المهرجانات و فنانيين بمئات الملاين يخلصو بالعملة الصعبة على حساب الدولة.
  • زوز تلافز و عدد من الاذاعات العمومية، رغم الي تصرف عليهم الدولة مليارات أضعاف الي يصرفهم الإعلام الخاص، رغم هذا نلقو الاعلام الخاص هو الي ينتج و يبدع و الاعلام العمومي مزال يجتر في “نسيبتي العزيزة” و برامج تعمل في أقل نسب مشاهدة.
    مجال دخل فيه الاستثمار الخاص بقوة و تلفزة و إذاعة وحدة كافين للاهتمام بالأخبار و النشاط الرسمي للدولة بميزانية صغيرة.

=> الثلاثة مجالات هاذم (رياضة، ثقافة، اعلام) دخل فيهم بقوة الإستثمار و النشاط الخاص من التوانسا و بقاء سلطة و تحكم الدولة فيهم موش بش يخليهم يتطورو و يتقدمو و يعملو على رواحهم.. لذلك يلزم الدولة ترفع يدها و اشرافها على النشاط العام و تسيب المجتمع ينشط و يتحرك بحرية.

_ ? في النهاية:


إذا نحبو على دولة قوية مليانة عظلات و عظم صحيح، يلزم نعملو ريجيم قاسي للدولة بتنحية كل هالشحومات المتغلغلة في حروقها، ريجيم بش يكون مؤلم للجميع و بش يعمل بارشا رفض و معارضة يوم الي تبدى الدولة القومية في تنفيذو و الاكيد بش يعمل بارشا رفض و احتجاج و بكاء…
لكنها إجراءات يلزم تتعمل بش من بعدها إنجمو نخدمو على تقوية عظلاتها و صلابة عظامها و نجاعة جهازها العصبي.

_____
Hashtag: #القومية
_التونسية ??
الحزب القومي التونسي: www.tnp.tn ✌

Visits: 84