النضال والعقلية الأنانية.. موقف القومية التونسية
– النضال لاجل اي قضية ,فكرة او مشروع يتجاوز “الانانية” و”المصلحة الشخصية” هوا فعل غريب تونسيا لنو “العثلية العامة ” تراه “خسارة”. في العموم احنا التوانسة نحسو انو عطيان الوقت , الجهد , الاعصاب , العاطفة , الفلوس و ممكن الصحة و السلامة الشخصية/العايلية للقضية هوا “خسارة” . – العقلية التونسية تعتبر انو الوقت , الفلوس , الصحة , الجهد ,الاعصاب و العمر بكلو لازمو يستثمر يا في المصلحة الشخصية المباشرة (الحياة الدنيا) يا في المصلحة الشخصية المؤجلة (الحياة الآخرة) و كل ماهو خاطي هاذا هوا مضيعة و اهدار للعمر و الجسد .
– لكن المناضل و هوا يعطي من عمرو ,من فلوسو ,من مخو , من صحتو وسلامتو علجال القضية/الفكرة/المشروع و الغاية الي يمن بيها فانو ميخسرش حتا شي و انما يربح .
– المناضل مهوش يعطي لقضية خارجية ,مهوش يعطي للغير ,مهوش يطيش في املاكو . الايمان بالقضية هوا جزء من روح المناضل ,المناضل يتوحد مع القضية و انتصار القضية هوا انتصارو الشخصي و خسارة القضية هيا خسارتو الشخصية .
– المناضل هوا انسان فاعل علخر في العالم ,المناضل انسان عندو رؤية ,مثال و ارادة يحب بحققها في هاذا العالم ,المناضل انسان يحب يبدل العالم و يردو على المثال الي يمن بيه .المناضل انسان يحب يخلي بصمة و يصنع الفارق في هاذا العالم .
– المناضل هوا انسان يعيش ايمانه مهوش يتظاهر بيه ,الايمان هوا محور , مرتكز الروح المناضلة و غاية الروح المناضلة الي تسمو على الاهداف السطحية الطفولية المباشرة وتتجاوز الخوف ,الرغبة ,التردد و تواجه الصعوبات/العراقيل/التحديات و تولي “حالة قوة” و “قيمة حقيقية” في هاذا العالم .
– المناضل ميخسرش ,المناضل يربح روحيا .المناضل وهوا يعطي كل شي للقضية قاعد يعطي لروحو لنو المناضل تهمو “روحو” قبل متهمو شيخاتو و رفاهية حياتو . المناضل مهما كان القضية الي يناضل عليها فانو يحقق مثال روحي حتا لو مكانش يمن بالروح اصلا .
– اسمى ما في الانسان هيا روحو ,القيمة الحقيقية للانسان هيا في جوهرو الروحي , كل العظمة الانسانية ناتجة على مجهودات روحية تترجم جسديا .القوة الانسانية هيا روحية قبل متكون جسدية.استحقاق الانسان للامانة الالاهية جا بسبب “الروح الالاهية” الي نفخها فيه الله .
– الحياة فيها الموت و التغيير و الفعل التاريخي الانساني يتجاوز الموت و يخلي اثر ابدي .الانسان متخلقش باش يركش و يشيخ .الانسان تخلق باش يسود على العالم و يحقق فيه ارادتو ( هاذا جوهر المهمة /الامانة : خلافة الله في الكون) .
الراحة,اللامة ,الطمأنينة ,الاستقرار ,الشيخة كلها حواجز و سلاسل للروح الانسانية تضعفها ,تحبسها ,تتحكم فيه و تحط من قيمتها و تشوه جوهرها العظيم ,الخالد و الالاهي .
– القومية التونسية هيا مشروع ,القومية التونسية هيا حلم ,القومية التونسية هيا قضية .القومية التونسية هيا “حالة نضالية” او لا تكون . القومية التونسي هيا مشروع روحي-سياسي و النضال القومي التونسي هاو ربح روحي للمناضل و ربح روحي للامة التونسية في المحصلة النهائية .
Hits: 96
